ബി.എൽ.എം തട്ടിപ്പോ? – ചെയർമാന്റെ ഭാര്യക്ക് 30 കോടി, ‘രാഗം’ പണയപ്പെടുത്തി 50 കോടി; നിക്ഷേപകരുടെ പണം എങ്ങോട്ട്?
തിരുവനന്തപുരം: സാധാരണക്കാരായ നിക്ഷേപകരുടെ കോടിക്കണക്കിന് രൂപയുടെ ഭാവി തുലാസിലാക്കി ഭാരത് ലജ്‌ന മൾട്ടിസ്റ്റേറ്റ് ഹൗസിംഗ് കോ-ഓപ്പറേറ്റീവ് സൊസൈറ്റിയിൽ (ബി.എൽ.എം) വൻകിട സാമ്പത്തിക ഇടപാടുകൾ നടക്കുന്നതിന്റെ ഞെട്ടിക്കുന്ന വിവരങ്ങൾ പുറത്ത്. സ്ഥാപനത്തിന്റെ ചെയർമാൻ ആർ. പ്രേംകുമാറിന്റെ ഭാര്യക്ക് 30 കോടി രൂപയുടെ വായ്പ അനുവദിച്ചതും, അടുത്തിടെ വാങ്ങിയ തൃശ്ശൂരിലെ രാഗം തിയേറ്റർ പണയപ്പെടുത്തി 50 കോടി രൂപയുടെ മറ്റൊരു വായ്പ എടുത്തതുമാണ് ഇപ്പോൾ വിവാദമായിരിക്കുന്നത്. നിക്ഷേപകർക്ക് പണം തിരികെ നൽകാതെ പ്രതിസന്ധിയിലാണെന്ന് പറയുന്ന സ്ഥാപനം, എൺപത് കോടിയോളം രൂപയുടെ ഈ ഇടപാടുകൾ നടത്തിയത് ആരുടെ താൽപ്പര്യപ്രകാരമാണെന്ന ചോദ്യം ശക്തമാവുകയാണ്. ഇതിനിടെ, ക്രമക്കേടുകൾ പുറത്തുകൊണ്ടുവരുന്ന മാധ്യമ സ്ഥാപനങ്ങൾക്ക് നേരെ രാഷ്ട്രീയ നേതാക്കളുടെ ഭീഷണിയും ഉയർന്നിട്ടുണ്ട്.
നിക്ഷേപകർ അറിയാതെ 80 കോടിയുടെ ഇടപാടുകൾ
സ്ഥാപനത്തിന്റെ സാമ്പത്തിക ഇടപാടുകളിലെ സുതാര്യതയില്ലായ്മയും ഫണ്ട് ദുരുപയോഗവും വ്യക്തമാക്കുന്നതാണ് ഇപ്പോൾ പുറത്തുവന്ന രേഖകൾ.
- തൃശ്ശൂരിലെ രാഗം തിയേറ്റർ പണയപ്പെടുത്തി 50 കോടി: തൃശ്ശൂർ നഗരഹൃദയത്തിലെ രാഗം തിയേറ്റർ അടുത്തിടെയാണ് ബി.എ.ൽ.എം വാങ്ങിയത്. ഈ ആസ്തി ചെന്നൈയിലെ ബ്രിയോസ് ഫിൻവെസ്റ്റ് ഇന്ത്യ ലിമിറ്റഡ്, കൊട്ടക് മഹീന്ദ്ര ബാങ്ക് എന്നിവിടങ്ങളിൽ പണയപ്പെടുത്തി 50 കോടി രൂപ വായ്പ എടുത്തതായി രജിസ്ട്രേഷൻ വകുപ്പിന്റെ രേഖകൾ വ്യക്തമാക്കുന്നു. 2024 ഡിസംബർ 23-നാണ് ഈ ഇടപാട് നടന്നത്. നിക്ഷേപകരുടെ അറിവോ സമ്മതമോ ഇല്ലാതെ സ്ഥാപനത്തിന്റെ പ്രധാന ആസ്തികളിലൊന്ന് പണയപ്പെടുത്തി ഇത്ര വലിയ തുക സമാഹരിച്ചത് എന്തിനാണെന്ന് വ്യക്തമല്ല.
- ചെയർമാന്റെ ഭാര്യക്ക് 30 കോടിയുടെ കിട്ടാക്കടം: ഇതിന് പുറമെയാണ് ചെയർമാൻ പ്രേംകുമാറിന്റെ ഭാര്യ പ്രഭ പ്രേംകുമാറിന് സ്ഥാപനം അനുവദിച്ച 30 കോടി രൂപയുടെ വായ്പ. 2023-ൽ അനുവദിച്ച ഈ വായ്പയിന്മേൽ മുതലോ പലിശയോ നാളിതുവരെ തിരിച്ചടച്ചിട്ടില്ല. ഒരുവശത്ത് സ്ഥാപനത്തിന്റെ ആസ്തികൾ പണയപ്പെടുത്തി കോടികൾ സമാഹരിക്കുകയും, മറുവശത്ത് തലപ്പത്തുള്ളവരുടെ കുടുംബാംഗങ്ങൾക്ക് കോടികൾ യാതൊരു തിരിച്ചടവുമില്ലാതെ നൽകുകയും ചെയ്യുന്നത് നിക്ഷേപകരുടെ പണം വ്യാപകമായി ദുരുപയോഗം ചെയ്യപ്പെടുന്നു എന്നതിന്റെ വ്യക്തമായ സൂചനയാണ്.
വാർത്ത നൽകിയാൽ ഭീഷണി; പിന്നിൽ രാഷ്ട്രീയ സ്വാധീനമോ?
ബി.എൽ.എമ്മിനെതിരായ വാർത്തകൾ പ്രസിദ്ധീകരിച്ച മാധ്യമ സ്ഥാപനങ്ങൾക്ക് നേരെ ഭീഷണി ഉയർന്നതായും റിപ്പോർട്ടുകളുണ്ട്. മുൻ മന്ത്രി അഹമ്മദ് ദേവർകോവിലിന്റെ പാർട്ടിയായ ഐ.എ.ൻ.എല്ലിന്റെ തിരുവനന്തപുരം ജില്ലാ ജനറൽ സെക്രട്ടറിയാണെന്ന് അവകാശപ്പെട്ട വ്യക്തി, വാർത്ത പ്രസിദ്ധീകരിച്ചതിനെതിരെ ഫോണിൽ വിളിച്ച് ഭീഷണിപ്പെടുത്തിയതായി ഒരു പ്രമുഖ ദേശിയ ഓൺലൈൻ മാധ്യമം റിപ്പോർട്ട് ചെയ്തു.
നേരത്തെ ബി.എൽ.എമ്മിനെതിരെ രജിസ്റ്റർ ചെയ്ത ഗുരുതരമായ ക്രിമിനൽ കേസുകൾ പോലും ദുരൂഹ സാഹചര്യങ്ങളിൽ പോലീസ് പിൻവലിച്ചത് വലിയ ചർച്ചയായിരുന്നു. ഇതിന് പിന്നിൽ ഉന്നത രാഷ്ട്രീയ-പോലീസ് സ്വാധീനമുണ്ടെന്ന ആരോപണം ശക്തമാക്കുന്നതാണ് ഇപ്പോൾ മാധ്യമങ്ങൾക്ക് നേരെയുണ്ടാകുന്ന ഭീഷണി.
ഒരുവശത്ത് നിയമത്തിന്റെ സാങ്കേതികത്വത്തിൽ പിടിച്ച് കേസുകളിൽ നിന്ന് രക്ഷപ്പെടുകയും, മറുവശത്ത് നിക്ഷേപകരുടെ പണം ഉപയോഗിച്ച് വാങ്ങിയ ആസ്തികൾ അവരുടെ അറിവില്ലാതെ കോടികൾക്ക് പണയപ്പെടുത്തുകയും ചെയ്യുന്ന ബി.എൽ.എമ്മിന്റെ പ്രവർത്തനങ്ങൾ അതീവ ഗൗരവത്തോടെയാണ് നിരീക്ഷിക്കപ്പെടുന്നത്. മാധ്യമങ്ങൾക്ക് നേരെയുയർന്ന ഭീഷണിയുടെ പശ്ചാത്തലത്തിൽ, സ്ഥാപനത്തിന്റെ രാഷ്ട്രീയ-പോലീസ് ബന്ധങ്ങളെക്കുറിച്ചും സാമ്പത്തിക ഇടപാടുകളിലെ ദുരൂഹതകളെക്കുറിച്ചും വിശദമായ അന്വേഷണം നടത്തി തുടർ റിപ്പോർട്ടുകൾ പ്രസിദ്ധീകരിക്കുന്നതാണ്.
